*Rakhine-a Muslim Villager thahtuah ARSA chu mawhphurtuah an puh:
Arakan Rohingya Salvation Army (ARSA) te chuan Myanmar ram Rakhine State-a Buthidaung Township-a Muslim khuaa mi, kum 65 mi chu an rubo a, an that nia sawi a ni a, Mipuite sawi danin, he an mi rukbo hi lawng khalhtu a ni a, zanlai pelh vel khan silai keng mi pali emaw panga emaw chuan tih luihna hmangin an hruai lui a ni. A chhungte chuan ARSA hian Rakhine thingtlang hmun tam zawk thununtu pawl Arakan Army (AA) nena inzawmna nei nia an sawi vang a rukbo niin an sawi. A hnu lawkah he khaw bulawk a luiah a ruang hi chhar a ni.
He thil hi thleng chung chang hi ARSA member leh junta sipaite, police emaw, administrative official-te’n an hre lo a, anni hian he tualthahna chungchangah hian a chhungte zawhna an zawt a ni. Mi ṭhenkhat chuan he biala ARSA member-te hnathawh chungchangah an lungawi loh thu an sawi a, a bik takin Maungdaw leh Buthidaung township-a rukbo nih hi an hlau hle.
Junta hian ARSA sipaite hi Maungdaw leh Buthidaung-a Muslim khaw bula outpost tam tak awmna ramri venhimna khirh tak chu an paltlang a phalsak mai thei niin rinhlelhna a awm. Khaw mipuite chuan ARSA awm thu hi junta border force-te hnenah an report niin an sawi a, mahse hmalak a la ni lo. Tun hmaa ARSA lo thlen thu reporttu khaw mi ṭhenkhat chu thah an ni nia sawi a ni. ARSA hian kum 2016 leh 2017-a Maungdaw-a ramri outpost-te an beih nia sawi a nih hnuah a hming a chher chho a, Bangladesh hmar lama Cox’s Bazar, Rakhine-ah pawh active takin hma an la nia hriat a ni a, he lai hmun ah hian fighter 300 vel an awm nia chhut a ni bawk.