*Manipur a Tribal ruang hal lai video thar tarlan a ni:
Manipur-a thil rapthlak tak thlengah, tribal mi nia sawi ruang hal a nih lai video chu online-ah a chhuak a. Thu dawn danin, thi hi hriat chian a la ni lo. Mahse, Manipur DGP Rajiv Singh chuan video hi thla 4 vela upa ang maiin lang mah se, video dik leh dik loh finfiah an tum thu a sawi.
Thuthang awm danin a ruh leh ruang te chu an la khawm a, an phum a ni.
Hetihlai hian, Manipur Chief Minister N Biren Singh chuan tribal group-te thusawi chu ngaithla mah se, sorkar chuan he thil thleng chungchangah hian thuthlukna a la siam lo.
A lehlamah Kuki-Zo aiawh pakhat chuan tharum thawhna thlen lai hian khawtlang mi panga emaw paruk emaw chu nungdama hal an nih nia sawi a nih avangin a tuartu nihna hriat an tum thu a sawi.
Hemi hma hian October 6 khan The United Nations Human Rights chuan Manipur-a activist Babloo Loitongbam chenna in tihchhiat chungchangah an lungawi loh thu an lo sawi tawh a ni. UN Human Rights chuan he thil thlen chhan hi tualchhung pawl Meitei Leepun leh Arambai Tengol te chu chiang takin a puh a ni.
Hetianga thil thleng hi October 5 khan Imphal West district hnuaia Kwakeithel Thiyam Leikai-a awm Human Rights Alert director Babloo Loitongbam chenna in chu misual hriat lohte’n an bei a, chhungkaw thil engemaw zat an tihchhia nia sawi a ni.
Thu dawnna rintlakte sawi danin, tlai dar 6.30 vel khan a chenna inah mi hriat loh 30-40 vel an lo kal a ni. He mi hriat loh pawl hian thil an tichhia nia sawi a ni a, chung zingah chuan car, chair, leh window panes te pawh a tel.
Lamphel Police Station leh Imphal West district Police-te team chu a hmunah an thleng thuai a, venhimna kawngah a tul angin hma an la nghal a ni.